phir yaad use karne kī fursat nikal aa.ī
mat pūchhiye kis moḌ pe qismat nikal aa.ī
kuchh in dinoñ dil us kā dukhā hai to hameñ bhī
us shaḳhs se milne kī sahūlat nikal aa.ī
ābād hue jab se un āñkhoñ ke kināre
duniyā jise samjhe the vo jannat nikal aa.ī
jo ḳhvāb kī dahlīz talak bhī nahīñ aayā
aaj us se mulāqāt kī sūrat nikal aa.ī
ab aa ke gale miltā hai pahle thā gurezāñ
kyā ham se use koī zarūrat nikal aa.ī
ik shaḳhs kī mahbūb-nigāhī ke sabab se
'ashfāq' tumhārī bhī to qāmat nikal aa.ī