kahā kis ne musalsal kaam karne ke liye hai

ye duniyā asl meñ ārām karne ke liye hai

mohabbat aur phir aisī mohabbat jo hai tujh se

chhupā.eñ kyuuñ ye ḳhushbū aam karne ke liye hai

karegā kaun tujh ko terī be-mehrī kā qaa.il

yahāñ jo bhī hai tujh ko raam karne ke liye hai

ye kār-e-ishq meñ uljhī huī be-nām duniyā

haqīqat meñ numūd o naam karne ke liye hai

bahut chhoTā sā dil aur is meñ ik chhoTī sī ḳhvāhish

so ye ḳhvāhish bhī ab nīlām karne ke liye hai

ġhazal kahnī phir us meñ apne dil kī baat kahnī

yahī kaafī hameñ badnām karne ke liye hai

bahut din rah chuke nām-āvaroñ ke biich 'ashfāq'

ab apnā naam bas gumnām karne ke liye hai