dil TūTne kā band ye rañj-o-malāl kar
ab pheñknā ye kāñch kahāñ hai ḳhayāl kar
masrūf DhūñDne meñ hai koī shikār ko
baiThā hai koī apnā yahāñ jaal Daal kar
jis aadmī ko zahr bhī pachtā thā ai tabīb
piine lagā hai aaj vo paanī ubaal kar
nāsūr ho gayā thā ye nā-qābil-e-rafū
dil pheñknā paḌā hameñ āḳhir nikāl kar
īmān ko bhī apne jahāñ se bachā.iye
locker meñ māl-o-zar hī na rakhiye sambhāl kar
gar pūchhnā hī hai to zamāne kā haal pūchh
baare paḌosiyoñ ke na ham se savāl kar
'jānib' nasīb vaale to chāheñge bas yahī
ho faisle jahān meñ sikke uchhāl kar