pyaar kā yuuñ dastūr nibhānā paḌtā hai
qātil ko siine se lagānā paḌtā hai
duniyā ko pur-nūr banāne kī ḳhātir
apne ghar ko aag lagānā paḌtā hai
but-ḳhāne yūñhī ta.amīr nahīñ hote
patthar ko bhagvān banānā paḌtā hai
duniyā-dārī kī ḳhātir is duniyā kā
jaane kyā kyā naaz uThānā paḌtā hai
apne qātil kī ma.asūm nigāhoñ se
dil kā har ik zaḳhm chhupānā paḌtā hai
aisā bhī vaqt aatā hai sardārī par
añgāroñ ko phuul banānā paḌtā hai
aisā bhī hotā hai hijr kī rātoñ meñ
dīvāroñ ko haal sunānā paḌtā hai
jin galiyoñ meñ qatl hue armān 'valī'
un galiyoñ meñ aanā jaanā paḌtā hai