kahāñ hai aisī zamīñ jis pe āsmān na ho
vo kaisā shahr jahāñ ek bhī makān na ho
hamāre dasht ne itnā to intizām rakkhā
saroñ pe dhuup rahe koī sā.ebān na ho
dil-o-dimāġh kī uljhan meñ ye kahāñ mumkin
ki zehn-o-dil to thakeñ ruuh ko thakān na ho
ḳhud apnī piiTh to ham thapthapā nahīñ sakte
hameñ hai ḳhauf ki bejā koī gumān na ho
maiñ ḳhvāb dekh rahā huuñ is ehtiyāt ke saath
itāb-e-sub.h se sapnā lahū-luhān na ho
zamīñ se duur chale aa.e haiñ magar 'bebāk'
duā karo ki yahīñ ḳhatm ye uḌaan na ho