merī koshish hai aa.ina bhī rahūñ
aur Takrā ke TūTtā bhī rahūñ
ik qafas meñ ḳhayāl-o-bū kī tarah
qaid bhī maiñ rahūñ rihā bhī rahūñ
ḳhud se kah luuñ maiñ dāstāñ apnī
dard meñ kuchh to ḳhush-navā bhī rahūñ
ho na jā.ūñ maiñ be-hisī kā shikār
tujh se miltā rahūñ judā bhī rahūñ
roz kī kashmakash ke sho.aloñ meñ
aag bhī maiñ rahūñ havā bhī rahūñ
shab ko 'bebāk' kah rahā huuñ ġhazal
taaki maiñ sub.h-āshnā bhī rahūñ