tumhārī vāpsī hone kā andāza na ho jaa.e
kahīñ bikhrī huī miTTī tar-o-tāza na ho jaa.e
farishtoñ tum ne be āvāz andeshe nahīñ dekhe
yahī dīvār aage baḌh ke darvāza na ho jaa.e
baḌī ḳhvāhish hai phir se zindagī hamvār karne kī
magar us se kahīñ mismār shīrāza na ho jaa.e
abhī tak to natīja bhī pas-e-dīvār hai jānāñ
tirī is mahviyat se kal kā andāza na ho jaa.e
shabāhat pe adākārī asar-andāz hotī hai
abhī tak to ye chehrā hai kahīñ ġhāza na ho jaa.e