be-sabab ishq kab udaas rahā
vo tumhārā adā-shanās rahā
zindagī-bhar ḳhudī kā paas rahā
ishq kab mahv-e-iltimās rahā
har fasāna jo kah chukī duniyā
mere ġham kā hī iqtibās rahā
jāma-zebī ba-qadr-e-zauq rahī
ishq har shaḳhs kā libās rahā
tum se jab qurbateñ mayassar thiiñ
dil to us vaqt bhī udaas rahā
ġham kā paimāna ḳhud batā degā
kaun kitnā tumhāre paas rahā
un ko mujh se hazār duurī thī
maiñ to 'ehsās' un ke paas rahā