dard-āmez hai kuchh yuuñ mirī ḳhāmoshī bhī

raas aatī nahīñ mujh ko ye ḳhirad-poshī bhī

kaisī hairat hai ki ik maiñ hī na behosh rahā

kyā ta.ajjub hai ki chhātī nahīñ madhoshī bhī

yaad kā kaun sā aalam hai ki maiñ martā huuñ

aur zinda hai mirā ḳhvāb-e-farāmoshī bhī

kis kī ā.ankhoñ kā nasha hai ki mire hoñToñ ko

is qadar tar nahīñ kar saktī balā-noshī bhī

maiñ kināra bhī karūñ ḳhud se to mumkin hai kahāñ

ki na ho tere ta.alluq se ham-āġhoshī bhī