tamām shahr hī terī adā se qaa.em hai
husūl-e-kār-gah-e-ġham duā se qaa.em hai
tasalsul is ke sivā aur kyā ho miTTī kā
ye ibtidā bhī mirī intihā se qaa.em hai
ḳhudā vajūd meñ hai aadmī ke hone se
aur aadmī kā tasalsul ḳhudā se qaa.em hai
tamām josh-e-mohabbat tamām hirs-o-havas
vafā ke naam pe har bevafā se qaa.em hai
ye fāsla faqat ek ret kī nahīñ dīvār
tire vajūd se merī anā se qaa.em hai