āyat-e-husn kī jab maiñ ne tilāvat kī thī

ishq ne aa ke mire haath pe bai.at kī thī

jab subūt aur zamāna thā mohabbat ke ḳhilāf

maiñ ne us vaqt zuleḳhā kī himāyat kī thī

mujh ko marne na diyā sher utāre mujh par

ishq ne bas ye mire saath ri.āyat kī thī

garm bāzār hai dil kā to ḳhasāra hī sahī

tai ḳharīdār se maiñ ne yahī qīmat kī thī

tum jo phir pūchhne aa.e ho unhī bātoñ kī

maiñ ne chup rah ke ka.ī baar vazāhat kī thī