Ghulam Husain Sajid

sawad-e-shahr se aghmaz karna chahta hun

Ghulam Husain Sajid

1951

savād-e-shahr se aġhmāz karnā chāhtā huuñ

ki maiñ apnā safar āġhāz karnā chāhtā huuñ

ḳhajil hūñgā matā-e-ishq par shāyad kisī din

abhī is faisle par naaz karnā chāhtā huuñ

rag-e-jāñ se bhī jo nazdīk aatā rahā hai

maiñ kyā sach-much use hamrāz karnā chāhtā huuñ

ulaTnā chāhtā huuñ aaj maazī ke varaq maiñ

ki fardā darīcha baaz karnā chāhtā huuñ

kisī ke sāmne rakkhe hue ik aa.ine ko

maiñ apnī ruuh ġhammāz karnā chāhtā huuñ

parindoñ ko zarā der chup rahne kah kar

havā ko zamzama-pardāz karnā chāhtā huuñ

manānā chāhtā huuñ rūThne vāloñ ko 'sājid'

magar ik shaḳhs ko nārāz karnā chāhtā huuñ

Top Urdushayar.com