mil ga.ī hai bādiya-paimā.ī se manzil mirī

kaam aa.ī hai bil-āḳhir sa.i-e-lā-hāsil mirī

paañv dharne ko mayassar aa nahīñ paatī zamīñ

naav ruk jaatī hai aa kar jab lab-e-sāhil mirī

ik kamī merī tag-o-dau meñ kahīñ maujūd hai

ho nahīñ paa.ī abhī tak koī shai kāmil mirī

mil nahīñ paatī ḳhud apne-āp se fursat mujhe

mujh se bhī mahrūm rahtī hai kabhī mahfil mirī

maiñ yahīñ rah jā.ūñgā ho kar asīr-e-dām-e-asr

raah taktā hī rahegā merā mustaqbil mirī

kyā bachā.ūñ daan meñ kyā duuñ samajh aatā nahīñ

daulat-e-dil māñgtā hai mujh se ik saa.il mirī

koī apne se gilā hotā na 'sājid' dahr se

ġhaur se ik baat sun letā agar ye dil mirī