aks kitne utar ga.e mujh meñ
phir na jaane kidhar ga.e mujh meñ
maiñ ne chāhā thā zaḳhm bhar jaa.eñ
zaḳhm hī zaḳhm bhar ga.e mujh meñ
maiñ vo pal thā jo khā gayā sadiyāñ
sab zamāne guzar ga.e mujh meñ
ye jo maiñ huuñ zarā sā baaqī huuñ
vo jo tum the vo mar ga.e mujh meñ
mere andar thī aisī tārīkī
aa ke aaseb Dar ga.e mujh meñ
pahle utrā maiñ dil ke dariyā meñ
phir samundar utar ga.e mujh meñ
kaisā mujh ko banā diyā 'ammār'
kaun sā rañg bhar ga.e mujh meñ