Faisal Ajmi

hijr maujud hai fasane mein

Faisal Ajmi

1951

hijr maujūd hai fasāne meñ

saañp hotā hai har ḳhazāne meñ

raat bikhrī huī thī bistar par

kaT ga.ī silvaTeñ uThāne meñ

rizq ne ghar sambhāl rakkhā hai

ishq rakkhā hai sard ḳhāne meñ

raat bhī ho ga.ī hai din jaisī

ghar jalāne ke shāḳhsāne meñ

roz aaseb aate jaate haiñ

aisā kyā hai ġharīb-ḳhāne meñ

ho rahī hai mulāzmat 'faisal'

rā.egānī ke kār-ḳhāne meñ

Top Urdushayar.com