maiñ ġhaar meñ thā aur havā ke baġhair thā
ik roz āftāb ziyā ke baġhair thā
sāhil pe aa ke Duub ga.ī naav apne aap
ik shaḳhs us meñ apnī razā ke baġhair thā
sab ro rahe the ḳhauf kī dīvār se lage
kohrām thā ki saut-o-sadā ke baġhair thā
kyuuñ naqsh-e-pā tamām kisī dā.ere meñ the
ye kaun thā jo dast-e-duā ke baġhair thā
'faisal' jo shahr aap hī mismār ho gayā
kyā ilm kab se hamd-o-sanā ke baġhair thā