ġhubār dil meñ bharā kirkirī salām-alaik
hai kis ke kaam kī ye zāhirī salām-alaik
kareñ na sīdhī nigah dūsrī salām-alaik
hai ab ke yāroñ kī ye jharjharī salām-alaik
talavvun aisā in abnā-e-rozgār meñ hai
ki sub.h miliye to hai charparī salām-alaik
mabādā baat meñ bū-e-tama.a agar pāveñ
phir un kī āñkhoñ se terī girī salām-alaik
jo shaam dekho to phir in tiloñ meñ tel nahīñ
churā.ī āñkheñ haiñ bhauveñ phirī salām-alaik
ba-qaul-e-shā.er-e-bangāla 'azfarī' yuuñ rah
''ki khānā gāñTh kā in se nirī salām-alaik''