kahā ye maiñ ne ki apnī āñkhoñ meñ ḳhvāb rakhnā

kahā ye us ne ki aañkh rakhnā azaab rakhnā

ye maiñ ne pūchhā thā log kyuuñ mar rahe haiñ itne

javāb aayā tum un ke ḳhuuñ kā hisāb rakhnā

kahā ye maiñ ne zamīn par amn ho sakegā

kahā ki hāthoñ meñ alam rakhnā kitāb rakhnā

kahā ye maiñ ne ki zindagī kis tarah kaTegī

kahā ye us ne ki chāhatīñ be-hisāb rakhnā

kahā ye maiñ ne havā.eñ haiñ tund-o-tez kitnī

vo hañs ke bolī ki kashtiyāñ zer-e-āb rakhnā

kahā ye us ne ki dā.ere se nikal ke dekheñ

kahā ki pahle koī safar intiḳhāb rakhnā

kahā ye us ne ki bhiiḌ meñ ham bichhaḌ na jaa.eñ

kahā ki juuḌe meñ ek taaza gulāb rakhnā

kahā ye us ne ki ham agar sach kā saath deñ to

kahā ye maiñ ne ki sahne kī taab rakhnā