qile barbād kartā aur patthar chhoḌ jaatā hai
jahāñ jaatā hai ḳhuuñ kā ik samundar chhoḌ jaatā hai
mohabbat terī guzre hai mere dil se mire qātil
ki jaise luuT kar shahroñ ko lashkar chhoḌ jaatā hai
tirī yādoñ ko maiñ le kar kahīñ bhī saath jaatā huuñ
ki kaasa apnā kab darvesh ghar par chhoḌ jaatā hai
ye mere ishq kī daulat hai ūñchī qasr-e-sultāñ se
jo apnī saarī daulat ko yahīñ par chhoḌ jaatā hai