mubārak sāqī-e-mastāñ mubārak
faroġh-e-majlis-e-rindāñ mubārak
jabīn-e-shauq ke sajdoñ pe sajde
tujhe sañg-e-dar-e-jānāñ mubārak
tajalli-e-jamāl-e-rū-e-jānāñ
tujhe ai dīda-e-hairāñ mubārak
adā-e-dilbarī o dil-navāzī
tujhe ai ḳhusrav-e-ḳhūbāñ mubārak
ridā-e-ḳhvājgī tāj-e-vilāyat
tumheñ ai murshid-e-daurāñ mubārak
kisī ke zaḳhm-hā-e-dil ko yā-rab
kisī kī jumbish-e-mizhgāñ mubārak
dar-e-'vāris' pe hai 'bedam' kā bistar
tirī jannat tujhe rizvāñ mubārak