ye saaqī kī karāmat hai ki faiz-e-mai-parastī hai
ghaTā ke bhes meñ mai-ḳhāne par rahmat barastī hai
ye jo kuchh dekhte haiñ ham fareb-e-ḳhvāb-e-hastī hai
taḳhayyul ke karishme haiñ bulandī hai na pastī hai
vahāñ haiñ ham jahāñ 'bedam' na vīrāna na bastī hai
na pābandī na āzādī na hushyārī na mastī hai
tirī nazroñ pe chaḌhnā aur tire dil se utar jaanā
mohabbat meñ bulandī jis ko kahte haiñ vo pastī hai
vahī ham the kabhī jo raat din phūloñ meñ tulte the
vahī ham haiñ ki turbat chaar phūloñ ko tarastī hai
karishme haiñ ki naqqāsh-e-azal nairañgiyāñ terī
jahāñ meñ mā.il-e-rañg-e-fanā har naqsh-e-hastī hai
ise bhī nāvak-e-jānāñ tū apne saath letā jā
ki merī aarzū dil se nikalne ko tarastī hai
har ik zarre meñ hai innī-anallāh kī sadā saaqī
ajab mai-kash the jin kī ḳhaak meñ bhī josh-e-mastī hai
ḳhudā rakkhe dil-e-pur-soz terī shola-afshānī
ki tū vo sham.a hai jo raunaq-e-darbār-e-hastī hai
mire dil ke sivā tū ne bhī dekhī bekasī merī
ki ābādī na ho jis meñ koī aisī bhī bastī hai
hijābāt-e-ta.ayyun māne-e-dīdār samjhā thā
jo dekhā to naqāb-e-rū-e-jānāñ merī hastī hai
ajab duniyā-e-hairat ālam-e-gor-e-ġharībāñ hai
ki vīrāne kā vīrāna hai aur bastī kī bastī hai
kahīñ hai abd kī dhun aur kahīñ shor-e-anal-haq hai
kahīñ iḳhfā-e-mastī hai kahīñ iz.hār-e-mastī hai
banāyā rashk-e-mahr-o-mah tirī zarra-navāzī ne
nahīñ to kyā hai 'bedam' aur kyā 'bedam' kī hastī hai