justujū karte hī karte kho gayā
un ko jab paayā to ḳhud gum ho gayā
kyā ḳhabar yārān-e-rafta kī mile
phir na aayā us galī meñ jo gayā
jab uThāyā us ne apnī bazm se
baḳht jaage paañv merā so gayā
mujh ko hai kho.e hue dil kī talāsh
aur vo kahte haiñ ki jaane do gayā
ḳhair hai kyuuñ is qadar betāb haiñ
hazrat-e-dil aap ko kyā ho gayā
vo mirī bālīñ aa kar phir ga.e
jaag kar merā muqaddar so gayā
aaj phir 'bedam' kī hālat ġhair hai
mai-kasho lenā zarā dekho gayā