na kunisht o kalīsā se kaam hameñ dar-e-dair na bait-e-haram se ġharaz
ki azal se hamāre sajdoñ ko rahī tere hī naqsh-e-qadam se ġharaz
jo tū mahr hai to zarra ham haiñ tū bahr hai to qatra ham haiñ
tū sūrat hai ham ā.īna hameñ tujh se ġharaz tujhe ham se ġharaz
na nashāt-e-visāl na hijr kā ġham na ḳhayāl-e-bahār na ḳhauf-e-ḳhizāñ
na saqar kā ḳhatar hai na shauq-e-iram na sitam se hazar na karam se ġharaz
rakhā kūcha-e-ishq meñ jis ne qadam huā hazrat-e-ishq kā jis pe karam
use aap se bhī sarokār nahīñ jo ġharaz hai to apne sanam se ġharaz
tirī yaad ho aur dil-e-bedam ho tirā dard ho aur dil-e-bedam ho
'bedam' ko rahe tire ġham se ġharaz tire ġham ko rahe 'bedam' se ġharaz