mujhe jalvoñ kī us ke tamīz ho kyā mere hosh-o-havās bachā hī nahīñ
hai ye be-ḳhabarī ki ḳhabar hī nahīñ vo naqāb uThā ki uThā hī nahīñ
mire haal pe chhoḌ tabīb mujhe ki azaab hai mirī ziist mujhe
merā marnā hī mere liye hai shifā mere dard kī koī davā hī nahīñ
use DhūñDte DhūñDte kho ga.e hameñ huā kiyā aur kyā ho ga.e ham
hameñ pahroñ tak apnī ḳhabar hī nahīñ hameñ kosoñ tak apnā patā hī nahīñ
mirā haal ḳharāb sunā to kahā ki vo sāmne mere na aa.e kabhī
mujhe rote jo dekhā to hañs ke kahā ki ye sheva-e-ahl-e-vafā hī nahīñ
jahāñ koī sitam ījād kiyā mujhe kah ke falak ne ye yaad kiyā
ki bas ek dil-e-'bedam' ke sivā koī qābil-e-mashq-e-jafā hī nahīñ