ye khusravī-o-shaukat-e-shāhāna mubārak
ye qasr ye ḳhuddām ye kāshāna mubārak
mastoñ ko mubārak dar-e-mai-ḳhāna ke sajde
mai-ḳhāna tujhe murshid-e-mai-ḳhāna mubārak
ai chashm-e-tamannā tirī ummīd bar aa.e
uThtā hai naqāb-e-ruḳh-e-jānāna mubārak
bulbul ko mubārak ho havā-e-gul-o-gulshan
parvāne ko soz-e-dil-e-parvāna mubārak
lo uTh ga.e sab jalva-gāh-e-nāz ke parde
nazzāra-e-husn-e-ruḳh-e-jānāna mubārak
sarmad ko mubārak hoñ mai-e-sāf ke sāġhar
'bedam' hameñ durd-e-tah-e-paimāna mubārak