phailī hai dhuup jazba-e-isfār dekh kar
hargiz Thahar na sāya-e-ashjār dekh kar
chal aa vahīñ chaleñ ki jahāñ shor-o-shar na ho
tañg aa gayā huuñ garmī-e-bāzār dekh kar
afvāh vo uḌī thī ki maiñ kal bahut hañsā
rotā huuñ aaj sub.h kā aḳhbār dekh kar
aisā na ho ki qaum kā beḌā hī ġharq ho
taqrīr jhaaḌ qaum ke me.amār dekh kar
'jāmid' mirā vajūd hai malba banā huā
ik ḳhauf sar uThātā hai dīvār dekh kar