vasl meñ raftār-e-ma.ashūqāna dikhlātī hai niiñd

aaj kin aTkheliyoñ se āñkhoñ meñ aatī hai niiñd

yād-e-chashm-e-surmagīñ meñ shab ko gar aatī hai niiñd

sūrat-e-murġh-e-nigah āñkhoñ se uḌ jaatī hai niiñd

furqat-e-dildār meñ sahvan agar aatī hai niiñd

aañkh se bāhar hī bāhar aa ke phir jaatī hai niiñd

ain be-hoshī hai hushyārī na samjhā chāhiye

ahl-e-ġhaflat kī to bedārī bhī kahlātī hai niiñd

karvaTeñ le le ke kahte haiñ shab-e-furqat meñ ham

kis tarah ai ḳhuftagān-e-ḳhāk aa jaatī hai niiñd

in kī furqat meñ na pūchho sarguzisht-e-ḳhvāb-e-chashm

āj-kal pā-e-nigah kī Thokareñ khātī hai niiñd

sabza-e-ḳhvābīda-e-gulshan kā jab aatā hai zikr

tab qafas meñ koī dam bulbul ko aa jaatī hai niiñd

furqat-e-dildār meñ sone ko marnā kahte haiñ

āshiqoñ meñ ḳhvāb-e-marg aise hī kahlātī hai niiñd

niiñd ko bhī niiñd aa jaatī hai hijr-e-yār meñ

chhoḌ kar be-ḳhvāb mujh ko aap so jaatī hai niiñd

kahte haiñ sonā use chauñkā na roz-e-hashr tak

is hamārī baḳht-e-ḳhufta kī qasam khātī hai niiñd

kyā ġhalat samjhe vo aa.egā phaḌaktī hai jo aañkh

aañkh meñ ḳhauf-e-shab-e-furqat se tharrātī hai niiñd

furqat-e-dildār meñ jo raat bhar aa.ī na thī

vasl meñ aatī huī āñkhoñ sharmātī hai niiñd

muntazir rakhtī hai ġhamze kartī hai aatī nahīñ

o but-e-tarsā tirī furqat meñ tarsātī hai niiñd

kū-e-jānāñ se jo uThtā huuñ to so jaate haiñ paañv

daf.atan āñkhoñ se paañv meñ utar aatī hai niiñd

garmī-e-soz-e-jigar betāb kar detī hai jab

ThanDī sāñseñ aisī bhartā huuñ ki aa jaatī hai niiñd

teġh kā phal khāyā āb-e-teġh pī kar so rahe

kasrat-e-āb-o-ġhizā se vāqa.ī aatī hai niiñd

sūrat-e-zāhid na jaago hazrat-e-dil so raho

qibla-e-man kāba-e-maqsūd dikhlātī hai niiñd

is mirī dīvāngī par ai junūñ patthar paḌeñ

aañkh ke Dhele lagātā huuñ agar aatī hai niiñd

vaah re tāsīr-e-ulfat bal be-fart-e-ittihād

ġhash pe ġhash aate haiñ mujh ko jab unheñ aatī hai niiñd

sote ho to chashm-e-baddūr āñkheñ rahtī haiñ khulī

fitna-e-bedār kyā aise hī kahlātī hai niiñd

hijr meñ sone kī aisī hī tamannā ai 'vazīr'

dekhtā huuñ us ko hasrat se jise aatī hī niiñd