valvale jitne safar ke the safar itne na the

duur the raushan nagar ham se magar itne na the

band āñkheñ jab khulīñ to raushnī pahchān lī

be-ḳhabar ham hoñ to hoñ par be-basar itne na the

maslahat ke haath ab apnī anā bhī bik ga.ī

be-sar-o-sāmāñ the pahle bhī magar itne na the

mustahiq āñkheñ mirī jānib uThī thiiñ jis qadar

dukh to ye hai merī shāḳhoñ par samar itne na the

sat.h-e-chehra par bhī pahle ek Thahrāv sā thā

dil kī gahrā.ī meñ bhī 'mohsin' bhañvar itne na the