shu.ūr-e-zīst sahī e'tibār karnā bhī
ajab tamāsha hai lail-o-nahār karnā bhī
hadīs-e-ġham kī tavālat girāñ sahī lekin
kisī ke bas meñ nahīñ iḳhtisār karnā bhī
banā ke kāġhzī gul log ye samajhte haiñ
ki ik hunar hai ḳhizāñ ko bahār karnā bhī
ab is nazar se tirī raah dekhtā huuñ maiñ
tirā karam hai tirā intizār karnā bhī
guzārne ko to ham ne baras guzār diye
baḌā azaab hai ghaḌiyāñ shumār karnā bhī
ḳhulūs-o-mehr kī kohna rivāyatoñ pe na jā
qadīm rasm hai dhoke se vaar karnā bhī
ab us ke vāda-e-fardā kā zikr kyā karnā
mujhe pasand nahīñ inhisār karnā bhī
hameñ ne shauq-e-shahādat kī ibtidā kī thī
hamīñ pe ḳhatm huā jaañ nisār karnā bhī
jo 'rashk' karnā hai tum ko to 'rashk' mujh se karo
ki merā kaam hai logoñ se pyaar karnā bhī