ye chāñd itnā niDhāl kyuuñ hai ye sochtā huuñ
ye chāñdnī ko zavāl kyuuñ hai ye sochtā huuñ
mujhe to us kā malāl thā vo judā huā thā
use bhī us kā malāl kyuuñ hai ye sochtā huuñ
agar judā.ī kī lazzateñ hī azīz-tar haiñ
to mujh ko fikr-e-visāl kyuuñ hai ye sochtā huuñ
mire fasāne avaam ko bhī pasand kyuuñ haiñ
tire karam kā kamāl kyuuñ hai ye sochtā huuñ
agar mohabbat meñ saare rishtoñ kī azmateñ haiñ
to dushmanī kā savāl kyuuñ hai ye sochtā huuñ