ga.ī fasl-e-bahār gulshan se
bulbuloñ uḌ chalo nasheman se
fātiha bhī paḌhā na turbat par
jā ke lauT aa.e merī madfan se
mujh ko kaafī thī qaid-e-halqa-e-zulf
beḌiyāñ kyuuñ banā.īñ aahan se
zulf ke pech se na rah ġhāfil
dostī kar dilā na dushman se
ho garebāñ kā chaak ḳhaak rafū
taar haath aa.e jab na dāman se
nāz-o-ishva nayā nahīñ sīkhā
shoḳh tarrār hai laḌakpan se
chhoḌ kar tum agar ga.e tanhā
jī nikal jā.egā mire tan se
hai ka.ī din se muntazir 'ra.anā'
jalva dikhlāo aa ke chilman se