chilchilātī dhuup ne ġhussa utārā har jagah
chaḌh gayā ūñchā.ī par zehnoñ kā paarā har jagah
is zamīñ par ham jahāñ bhī haiñ vahāñ tārāj haiñ
āj-kal gardish meñ hai apnā sitārā har jagah
apnī kyā gintī farishte bhī vahāñ maare ga.e
ḳhvāhishoñ ne menkā kā ruup dhārā har jagah
maañg letī hai havā achchhe mavāqe dekh kar
ik na ik muTThī meñ rahtā hai sharārā har jagah
ġharq tūfānoñ meñ kar do yā bhañvar meñ Daal do
himmatoñ ke haath chhūte haiñ kinārā har jagah
tum nahīñ badle mahā-bhārat ke andhe bādshāh
har jagah sābit the ham tum ne nakārā har jagah