koī halchal hai na aahaT na sadā hai koī
dil kī dahlīz pe chup-chāp khaḌā hai koī
ek ik kar ke ubhartī haiñ ka.ī tasvīreñ
sar jhukā.e hue kuchh soch rahā hai koī
ġham kī vaadī hai na yādoñ kā sulagtā jañgal
haa.e aise meñ kahāñ chhoḌ gayā hai koī
yād-e-māzī kī pur-asrār hasīñ galiyoñ meñ
mere hamrāh abhī ghuum rahā hai koī
jab bhī dekhā hai kisī pyaar kā aañsū 'jāmī'
maiñ ne jaanā mire nazdīk huā hai koī