chamakte ḳhvāb milte haiñ mahakte pyaar milte haiñ
tumhāre shahr meñ kitne hasīñ āzār milte haiñ
chale aate haiñ chupke se ḳhayāloñ ke mah o anjum
mirī tārīk rātoñ ko bahut ġham-ḳhvār milte haiñ
dabe lahja meñ ye kah kar nasīm-e-jāñ-fazā guzrī
chalo un regzāroñ se pare gulzār milte haiñ
ġhazal ko tajrabāt-e-zindagī kī dhuup meñ 'jāmī'
na.e uslūb milte haiñ na.e meyār milte haiñ