binā dekhe tujhe apnā banā kar dekh letā huuñ

maiñ tere āstāñ par sar jhukā kar dekh letā huuñ

sunā hai raaz chāhat kā chhupānā saḳht mushkil hai

tirī tasvīr āñkhoñ meñ chhupā kar dekh letā huuñ

añdhere dil kī bastī ke bhī shāyad duur ho jaa.eñ

maiñ tere naam kī mash.al jalā kar dekh letā huuñ

shikāyat dostoñ kī hai mire ahbāb ke lab par

chalo ab dushmanoñ ko aazmā kar dekh letā huuñ

vo gul jān-e-bahār-e-ārzū hai log kahte haiñ

use shāḳh-e-tamannā par sajā kar dekh letā huuñ

mujh kuchh bhī nahīñ hāsil huā ūñchī uḌānoñ se

qadam apnī zamīñ par ab jamā kar dekh letā huuñ

duā apne liye maiñ ne kabhī māñgī nahīñ koī

tirī ḳhātir maiñ haath apne uThā kar dekh letā huuñ

paroñ meñ un ke kitnī tāqat-e-parvāz baaqī hai

parinde apnī sochoñ ke uḌā kar dekh letā huuñ

kahāñ pahuñchegā merā kārvān-e-shauq ai 'shāhid'

maiñ apne aap ko rahbar banā kar dekh letā huuñ