mujhe batlā.īye ab kaun sī jiine kī sūrat hai
zamāna is ghane jañgal meñ ik chīte kī sūrat hai
bikharte jism le kar tund tūfānoñ meñ baiThe haiñ
koī zarre kī sūrat hai koī Tiile kī sūrat hai
churā laayā thā āñkhoñ meñ jo ik tasvīr duniyā kī
vo ab sahrā meñ ik sahme hue bachche kī sūrat hai
mirī tahrīr ke har lafz meñ zinda haiñ āvāzeñ
magar hairān huuñ chehra mirā katbe kī sūrat hai
ye kaisī aag hai 'afzal' jale saa.e bhī peḌoñ ke
dhueñ meñ kis taraf jā.ūñ ajab raste kī sūrat hai