gahrā sukūt zehn ko behāl kar gayā
sochoñ ke phuul phuul ko pāmāl kar gayā
sūraj ne apnī aañch ko vāpas bulā liyā
lekin mire lahū ko vo sayyāl kar gayā
kyā faisla diyā hai adālat ne chhoḌiye
mujrim to apne jurm kā iqbāl kar gayā
jo log duur the vo bahut duur ho ga.e
ye taaza hādisa bhī gayā saal kar gayā
sahme hue haiñ chāroñ taraf raushnī ke aks
ik haath aa ke surḳh ka.ī gaal kar gayā
maiñ do qadam chalā thā ki Dhalvān aa ga.ī
'afzal' safar to merā burā haal kar gayā