vo mire ḳhvāb-e-pairahan chhū kar
uTh gayā aañkh kī chubhan chhū kar
phir vo mānūs ḳhushbueñ lauTīñ
phir havā.eñ chalīñ badan chhū kar
ḳhvāb āñkhoñ meñ rañg tair ga.e
badliyāñ aa ga.iiñ kiran chhū kar
duur kyuuñ pattharoñ pe jā baiThā
vo mirī ruuh kī thakan chhū kar
titliyāñ jañgaloñ ko lauT ga.iiñ
rañg-e-fitrat chaman chaman chhū kar
khaa.ī hogī vahī qasam tū ne
phir kisī zulf kī shikan chhū kar