diloñ se ḳhauf ke āseb-o-jin nikāltā hai
vahī charāġh jalātā hai din nikāltā hai
ajiib tesha hai mazdūr kā pasīna bhī
pahāḌ kaaT ke rāsta kaThin nikāltā hai
ye bādshāh nahīñ hai faqīr hai sūraj
hamesha raat kī jholī se din nikāltā hai
zarā sī der meñ koī gulāb toḌegā
jo apne coat ke collar se pin nikāltā hai
usī ke naam se mansūb hai ġhazal apnī
jo naam phuul khilātā hai din nikāltā hai