ḳhayāl jaan se baḌh kar safar meñ rahtā hai

vo merī ruuh ke andar safar meñ rahtā hai

jo saare din kī thakan oḌh kar maiñ sotā huuñ

to saarī raat mirā ghar safar meñ rahtā hai

janam janam se mirī pyaas sar paTaktī hai

janm janm se samundar safar meñ rahtā hai

mirā yaqīn karo us ke paañv meñ til hai

isī liye vo barābar safar meñ rahtā hai

maiñ dil hī dil meñ jise pūjne lagā huuñ bahut

vo devtā nahīñ patthar safar meñ rahtā hai