dil dhaḌaktā hai ki tū yaar hai saudā.ī kā
tere majnūñ ko kahāñ paas hai rusvā.ī kā
barg-e-gul se bhī kam ab koh-e-ġham us ne jaanā
ye bharosā to na thā dil kī tavānā.ī kā
kījiye chaak garebāñ ko bahār aa.ī hai
zikr be-lutf hai yaañ sabr o shakebā.ī kā
sarv sābit-qadam is vāste gulshan meñ rahā
nahīñ dekhā kabhī jalva tirī rānā.ī kā
zor manzūr-e-nazar to tū 'fuġhāñ' rakhtā hai
maiñ to banda huuñ tirī chashm kī bīnā.ī kā