gul ho sabā ho sham.a ho sho.ala ho chāñdnī ho tum
jhalkī thī koh-e-tūr par bas vahī raushnī ho tum
tum se vajūd hai mirā harkat-e-qalb ho tumhī
quvvat-e-zehn-o-dil ho tum ruuh kī tāzgī ho tum
vābasta tum se jo bhī hoñ mujh ko vo ġham qubūl haiñ
baḳhshe sukūñ jo dā.imī bas ik vahī ḳhushī ho tum
mere taḳhaiyyulāt kī parvāz ho ga.ī buland
jab se nazar ke rāste zehn meñ aa ga.ī ho tum
tum se kahā bhī thā 'majīd' ifshā na karnā rāz-e-ishq
rusvā hue galī galī ye kaise aadmī ho tum