dil meñ tere ḳhayāl kī ḳhushbū

hijr meñ hai visāl kī ḳhushbū

dil ke jazbe javān rakhtī hai

tere husn-o-jamāl kī ḳhushbū

kaash tere javāb se aa.e

mere har ik savāl kī ḳhushbū

kaash tujh ko bhī ho kabhī mahsūs

mere nā-gufta haal kī ḳhushbū

mujh ko apne zavāl meñ se bhī

aa rahī hai kamāl kī ḳhushbū

ham faqīroñ se duur rahtī hai

hashmat-o-jāh-o-māl kī ḳhushbū

phuul se aa rahī hai jo sab ko

asl meñ hai nihāl kī ḳhushbū

ek paude ke phuul haiñ lekin

hai judā Daal Daal kī ḳhushbū

hai 'munavār' tumhāre hoñToñ meñ

ik parī-ruḳh ke ḳhaal kī ḳhushbū