tire ġham se dil shādmāñ dekhtā huuñ

tujhe rāhat-e-jāvedāñ dekhtā huuñ

zamāne kī bargashtagī kā ye aalam

ki har shai ko dāman-kashāñ dekhtā huuñ

kabhī bijliyāñ raunaq-e-gulistāñ thiiñ

shajar aaj be-āshiyāñ dekhtā huuñ

kabhī apnī māyūsiyoñ par qanā.at

kabhī jānib-e-āsmāñ dekhtā huuñ

kabhī ḳhaak kī rif.atoñ par nazar hai

kabhī charḳh kī pastiyāñ dekhtā huuñ

ik andāz-e-vāraftagī hai na pūchho

kise dekhtā huuñ kahāñ dekhtā huuñ

mohabbat kā adnā tasarruf hai 'hirmāñ'

jahāñ maiñ nahīñ huuñ vahāñ dekhtā huuñ