lafzoñ meñ kaisā rañg-e-ma.ānī dikhā.ī de
mere qalam meñ aaj ravānī dikhā.ī de
jaise ho sat.h-e-ḳhvāb pe ik be-sutūñ makāñ
aalam tamām dosto faanī dikhā.ī de
ye daaġh daaġh apnā dil-e-ġham nasīb thā
yaaro nigār-ḳhāna-e-mānī dikhā.ī de
tum talḳh zindagī ke haqā.eq se be-ḳhabar
tum ko hayāt kyuuñ na suhānī dikhā.ī de
vo munjamid hai barf kī mānind ai 'shamīm'
bātoñ meñ jis kī sho.ala-bayānī dikhā.ī de