aap ke dil kā mire dil kā nafāz

kyā kare maqtūl-o-qātil kā nafāz

phir gayā mujh ko zabāñ de kar koī

khul gayā yuuñ uuprī dil kā nafāz

jāda-e-ishq-o-vafā meñ chāhiye

rahravoñ par shauq-e-manzil kā nafāz

mar ga.e lākhoñ galā ḳhud kaaT kar

allāh allāh teġh-e-qātil kā nafāz

ham ne paayā ham ne dekhā jā-ba-jā

ishq-e-sādiq husn-e-kāmil kā nafāz

phir ga.e nāvak bhī un ke dekh kar

mere dil meñ hasrat-e-dil kā nafāz

pahle dekh ā.īna ai ā.īna-rū

jāñch phir madd-e-muqābil kā nafāz

paañv rakhnā mujh ko mushkil ho gayā

thā ye hukm-e-mīr-e-mahfil kā nafāz

jazb-e-kāmil ishq meñ hai ḳhaas chiiz

ho na kyūñkar jazb-e-kāmil kā nafāz

ashk āñkhoñ se rukeñ mumkin nahīñ

dil hī tak mahdūd hai dil kā nafāz

'nūh' ġharq-e-bahr-e-ulfat ho ga.e

kaam aayā kuchh na sāhil kā nafāz