ahl-e-ulfat se tane jaate haiñ

roz roz aap bane jaate haiñ

zab.h to karte ho kuchh dhyān bhī hai

ḳhuun meñ haath sane jaate haiñ

rūThnā un kā ġhazab Dhā.egā

ab vo kyā jald mane jaate haiñ

kuchh idhar dil bhī khiñchā jaatā hai

kuchh udhar vo bhī tane jaate haiñ

kyuuñ na ġham ho mujhe rusvā.ī kā

vo mire saath sane jaate haiñ

dil na ghabrā.e ki vo ruuTh ga.e

chaar fiqroñ meñ mane jaate haiñ

hai ye matlab nahīñ chheḌe koī

baiThe baiThe vo tane jaate haiñ

be-vafāoñ se vafā kī ummīd

'nūh' nādān bane jaate haiñ