ye nayā zulm na.ī tarz-e-jafā hai ki nahīñ

vo burā kah ke ye kahte haiñ sunā hai ki nahīñ

jī meñ aatā hai ki dekhūñ kabhī sar phoḌ ke maiñ

vasl un kā mirī qismat meñ likhā hai ki nahīñ

ham isī fikr meñ be-maut mare jaate haiñ

un ke hāthoñ se hamārī bhī qazā hai ki nahīñ

lo mire zikr-e-mohabbat pe ye irshād huā

qais o farhād kā anjām sunā hai ki nahīñ

sun ke ash.ār yahī 'nūh' se vo pūchhte haiñ

tujh meñ kuchh aur sifat is ke sivā hai ki nahīñ