kūcha-e-yār meñ kuchh duur chale jaate haiñ
ham tabī.at se haiñ majbūr chale jaate haiñ
ham kahāñ jaate haiñ ye bhī hameñ ma.alūm nahīñ
bāda-e-ishq se maḳhmūr chale jaate haiñ
garche aapas meñ vo ab rasm-e-mohabbat na rahī
toḌ-joḌ un ke ba-dastūr chale jaate haiñ
baiThe baiThe jo dil apnā kabhī ghabrātā hai
sair karne ko sar-e-tūr chale jaate haiñ
qais o farhād ke marne kā zamāna guzrā
aaj tak ishq ke mazkūr chale jaate haiñ