nākām-e-nashāt-e-aish-o-ḳhushī har vaqt ke ranj-o-ġham ne kiyā

jo tum ne kahā vo dil ne kiyā jo dil ne kahā vo ham ne kiyā

ye haal hai mere marqad kā aalam hai ye mere madfan par

sarsar ne kisī din jhāḌū dī chhiḌkāv kabhī shabnam ne kiyā

furqat meñ hazāroñ zulm sahe ulfat meñ hazāroñ rañj diye

kyā ham ne kiyā kyā tum ne kiyā ye tum ne kiyā vo ham ne kiyā

ā.ankhoñ se bahe miTTī meñ mile ahbāb ko parvā kuchh na huī

mātam mire ik ik aañsū kā mizhgāñ kī saf-e-mātam ne kiyā

ab koī use fariyād kahe yā koī use shikva samjhe

ham ko jo satāyā bandoñ ne to shukr ḳhudā kā ham ne kiyā

yuuñ aap bigaḌne ko bigḌeñ lekin ye zarā socheñ samjheñ

kyā sirf hamīñ ne ishq kiyā duniyā ne kiyā aalam ne kiyā

ye tum ne kiyā ye tum ne sunā ye tum ne kahā ye kaun kahe

vo pūchhte haiñ kyā ham ne kahā kyā ham ne sunā kyā ham ne kiyā

hasrat ko bhī hasrat aatī hai ibrat ko bhī ibrat aatī hai

vo shakl hamārī ġham meñ huī ye haal hamārā ġham ne kiyā

duniyā ko Duboyā ashkoñ se tūfān uThāyā ro ro kar

dariyā-e-ġham ulfat meñ bapā ai 'nūh' talātum ham ne kiyā